Om stillinga

Kultur- og likestillingsdepartementet (KUD) har ledig ei fast stilling som rådgjevar med ansvar for etatstyring i avdelinga for medier og kunst (MK). Stillinga er plassert i seksjonen som mellom anna har ansvar for film, dataspel og opphavsrett (MK2).

Vi søkjer deg som har interesse for filmpolitiske spørsmål og offentleg styring, og som ønskjer å bidra til gjennomføring av regjeringa sin filmpolitikk. I denne rolla får du ansvar for etatstyringa av Norsk filminstitutt (NFI), og vil arbeide med oppfølging og utvikling av filmfeltet i dialog med etaten og relevante aktørar.

KUD er eit relativt lite departement prega av stor offentleg merksemd kring sakene våre. Ansvarsområda er viktige for samfunnet, og arbeidskvardagen kan vere travel. Du blir ein del av eit vitalt og tverrfagleg miljø med mange engasjerte og kompetente medarbeidarar.

Arbeidsoppgåver

Den som blir tilsett, skal vere med på å gjennomføre regjeringa sin filmpolitikk. Hovudoppgåva er etatstyringa av Norsk filminstitutt (NFI), det vil seie den formaliserte styringsdialogen mellom departementet og underliggjande etat.

Andre arbeidsoppgåver vil vere varierte og utfordrande, og kan mellom anna omfatte:

• faglege råd til politisk leiing
• vurdering av enkeltsaker, bakgrunn til møter og annan sakshandsaming
• utgreiingsarbeid av filmpolitikk og relaterte område
• utkast til talar og innlegg

Stillinga inneber samarbeid med andre departement, etatar og forvaltingsnivå. Du vil òg kunne få oppgåver for andre seksjonar i avdelinga og i departementet elles.

Kvalifikasjonar

Du må ha:

• fullført høgare utdanning på masternivå, gjerne innan samfunnsvitskap eller økonomi, med gode resultat 
• minimum to års relevant erfaring
• god forståelse for samanhengen mellom politikk og forvaltning
• god evne til å uttrykkje deg klart og presist på norsk, både skriftleg og munnleg

Det er ein fordel om du har

• erfaring frå offentleg forvalting, gjerne frå eit departement
• kunnskap om etatstyring av underliggjande organ
• kunnskap om film, dataspel og kultur, og finansiering av sektoren

Personlege eigenskapar:

Vi ser etter deg som

• er analytisk og arbeider strukturert og nøyaktig
• har godt heilskapsblikk og evne til å forstå samanhengar
• kommuniserer klart og formidlar styringssignal på ein tydeleg måte
• er fleksibel og effektiv i gjennomføringa av oppgåver
• har evne og vilje til å arbeide både sjølvstendig og saman medandre 
• er initiativrik og løysingsorientert 

Vi vil leggje vekt på motivasjon og personlege eigenskapar.

Vi bruker bakgrunnssjekk frå Semac i rekrutteringsprosessane våre, og godkjend bakgrunnssjekk er ein føresetnad for tilsetjinga.

Den som blir tilsett i stillinga, må kunne autoriserast for tilgang til informasjon som er gradert som BEGRENSET etter sikkerhetsloven.

Vi tilbyr

• innplassering som 1436 rådgjevar med ei brutto årslønn frå 575 000 til 710 000 kroner. For spesielt kvalifiserte søkjarar kan høgare lønn vere aktuelt.
• fleksibel arbeidstid, med sommar- og vintertid
• høve til å trene i arbeidstida, tilgang til treningsrom og treningstilbod
• medlemskap i Statens pensjonskasse (SPK) med gode vilkår for pensjon, bustadlån og forsikring
• introduksjonsprogram for nytilsette og gode høve til kompetanseutvikling gjennom KUD-skolen og Departementsakademiet
• eit kunnskapsrikt, inkluderande og uformelt arbeidsmiljø

Vi held til midt i Oslo sentrum og skal i 2026 flytte inn i det nye Regjeringskvartalet som er under oppføring.

Kvardagen i departementsfellesskapet er prega av varierte og utfordrande arbeidsoppgåver. Vi har eit omfattande og viktig samfunnsoppdrag, og hos oss får du høve til å vere med på å utvikle den statlege politikken og forvaltninga av våre politikkområde.

Kultur- og likestillingsdepartementet er del av eit departementsfellesskap som er miljøsertifisert, og vi jobbar aktivt og systematisk med berekraftsansvaret i sektorane våre.

Inkluderande arbeidsliv og mangfald

Vi meiner at mangfald er ein styrke. Vi ønskjer medarbeidarar med ulik kompetanse og livserfaring og ulike fagkombinasjonar og perspektiv slik at vi kan løyse oppgåvene våre endå betre.

Kultur- og likestillingsdepartementet har som mål å tilsetje fleire personar frå underrepresenterte grupper. Les meir om krava for positiv særbehandling på Arbeidsgiverportalen.

Vi vil leggje til rette for medarbeidarar som har særskilde behov. Aktuelle tiltak kan til dømes vere å skaffe tekniske hjelpemiddel, tilpasse møblar eller endre rutinar, arbeidsoppgåver og arbeidstid.

Slik søkjer du

Vi er opptekne av kva du kan, og kva erfaringar og kompetanse du har. Dirfor vil vi stille deg nokre faglege spørsmål i tillegg til søknadsbrevet. 

I portalen er det viktig at du: 

• svarar på spørsmåla du får innleiingsvis
• skriv søknadsbrev
• fyller ut CV-felta i portalen (sjølv om du legg ved ein ferdigutfylt CV). Dette er nødvendig mellom anna for å vareta kravet om fullstendige søkjarlister
• lastar opp vitnemål/karakterutskrifter (som kan hentast direkte frå Vitnemålsportalen) og relevante attestar.

Offentleg søkarliste og kontakt

Dei som søker, må vere merksame på at opplysningar om dei kan bli offentleggjorde sjølv om søkarane ber om ikkje å bli oppførte på den offentlege søkarlista. Departementet vil svare på krav om unntak frå den offentlege søkarlista før ho blir offentleggjord.

Vil du vite meir om stillinga, kan du ta kontakt med avdelingsdirektør Constance Ursin på telefon +47 95 70 76 66.

Om avdelinga og seksjonen

Medie- og kunstavdelinga har ansvar for utvikling av den nasjonale politikken innanfor felta ytringsfridom, medium, pengespel, stiftingar, opphavsrett, kulturell og kreativ næring, film, dataspel, musikk, scenekunst og kunstnarpolitikk.

Avdelinga forvaltar lover og regelverk innanfor dei nemnde felta og løyvingar og tilskot til statlege og ikkje-statlege organ og institusjonar på området. 

Avdelinga er samansett av tre seksjonar. 

MK2, som stillinga er plassert i, har ansvar for opphavsrett, film og dataspel og kulturell og kreativ næring. Seksjonen har òg ansvar for etatstyringa av Norsk filminstitutt og eigarstyring av Filmparken AS.